لن أعيش في جلباب أبي -- الرواية و الدراما

أول ما تسمع جملة " لن أعيش في جلباب أبي" هييجي تلقائيا في دماغك " عبغفور و فاطنة" 😂 .. ومع حبي الشديد للمسلسل اللي    من وجهة نظري ميتزهقش منه قولت أقرا الرواية واشوف هي هتبقي زي المسلسل ولا لا

لن أعيش في جلباب أبي - الرواية

الرواية تأليف كاتب الحب والحرية " احسان عبد القدوس" اتكتبت سنة 1982 صدرت عن مكتبة غريب .. تناولت بشكل سطحي جدا حياة المليونير العصامي البخيل " عبد الغفور البرعي" .

أولا: الرواية فيها كم غلطات رهيبة في الاسماء مره تلاقي ابن عبد الغفور الكبير اسمه عبد الستار والمرة التانية تلاقيه عبد السلام (وهو اساسا شخصية لا وجود لها ولا تأثير في الرواية ).. (أمينة) البنت الامريكية اللي اسلمت مرة تلاقيها اسمها روزماري ومرة روزالين .. 

ثانياً: حياة عبد الوهاب البرعي واللي كان طول الوقت الكاتب بيحاول يوصل للقارئ اد ايه انه غريب شاب يكون في سنه وملهوش اي علاقات نسائية وكأن الطبيعي في مصر العلاقات الكتير قبل الجواز..

ثالثاً: حياة نظيرة البرعي واللي المفروض كل يوم بتروح تقعد مع حسين في بيته وتروح من عنده متأخر ده بالاخذ في عين الاعتبار ان اسرة عبد الغفور البرعي ورغم انهم انتقلو للعيشة في حي راقي زي الزمالك ولكن لسه محتفظين بعاداتهم وتقاليدهم القديمة  .. فهل من الطبيعي ان بنت تقعد مع شاب لفترات كبيرة في شقته لوحدهم !! 

الرواية في المجمل سطحية جداً فيها أفكار مغلوطة عن الدين والعادات والتقاليد حبكتها ضعيفة جداً وكم شخصيات كتير مفيش اي تسليط للضوء عليها .. اذا كنت عاوز تقرأها يبقي من باب الفضول فقط ليس للمتعة او الاستفادة علي الاطلاق 

الرواية ممكن تحملوها او تقراوها اون لاين من هنا : https://foulabook.com/ar/book/تحميل-لن-أعيش-في-جلباب-أبي-pdf

لن أعيش في جلباب أبي - الدراما التلفزيونية

مسلسل تلفزيوني إخراج أحمد توفيق اتعرض سنة 1996 .. سيناريو وحوار العظيم جداً مصطفي محرم .. مصطفي محرم أبدع في اظهار كل شخصية مكنش ليه اي دور في الرواية  وخلق حياة وروح للرواية مكنتش موجودة من أهم الشخصيات اللي أبرزها في المسلسل:

شخصية فاطمة زوجة عبد الغفور: مكنش ليها اي تأثير ولا ذكر في الرواية ولكن في المسلسل العظيمة عبلة كامل قدرت تصور الست المصرية بشكلها البسيط جدا من غير مكياجات بشعرها الطبيعي جدا الست اللي بتفرح تعيط تزعل تعيط 😅 وقفت ورا جوزها في السراء والضراء .. بناتها بالنسبه ليها في حته والولد في حته تانية .. عبلة بالدور ده سابت بصمة في كل بيت بافيهاتها بشكلها وطبيعتها وحركاتها جميلة جميلة جميلة 💕

 سنية: ناهد رشدي اللي قدرت تقنعك انها بنت عبلة كامل علي الرغم من انها سناً أكبر منها .. ملامحها البسيطة و وسذاجتها وجهلها وطبعها الطيب اللي بيشبه أمها جداً .. تحس انك متغاظ منها وهي مصرة تتجوز نبيل اللي طمعان فيها وباين جدا .. وتصعب عليك لما تكتشف انها كان بيتضحك عليها وبمنتهي السذاجة مصدقة 

بهيرة: وفاء صادق الشقية متزنة الي حد ما .. بعد اكتشافها ان جوازها كان مصلحة قررت تنفصل ولما جتلها الفرصة ترجع لجوزها تاني مرجعتش غير بشروطها وطبعها اللي يشبه طبع أبوها .. تخطف قلبك 

نفيسة (نوفا): منال سلامة تستفزك بطمعها واستغلالها لابوها وامها .. استضعافها لجوزها (خضير) ومحاولة استغلاله للسيطرة علي ثروة ابوها ..

المخرج أحمد توفيق أبدع في اختيار الشخصيات كأن كل شخصية متفصل عليها الدور حرفياً .. الموسيقي التصويرية الملحن حسن أبو السعود تشدك من علي بعد 💕

    لن أعيش في جلباب أبي - الدراما الاذاعية

كتير ميعرفوش انها بردو اتعملت تمثيلية إذاعية بطولة فريد شوقي وزهرة العلا ورانيا فرد شوقي وهشام عبد الحميد وغيرهم .. رؤية اذاعية محمد السيد عيد 

مسلسل للاسف  ممل جداً من وجهة نظري لا يقل سوءاً عن الرواية  ولكم من باب الفضول لينك التمثيلية : https://www.youtube.com/watch?v=zVP4M4E6Q-w