حديث الصباح والمساء -- بين الحياة والموت

سنة 1987 صدرت رواية حديث الصباح والمساء للكاتب العظيم نجيب محفوظ عن دار  الشروق وبعد اصدارها ب 14 سنة يعني سنة 2001 .. اشترك المخرج أحمد صقر مع الكاتب محسن زايد في صياغة الرواية واخراجها ك مسلسل تلفزيوني واللي حقق نجاح كبير جداً 

حديث الصباح والمساء -- الرواية

الرواية متقدمة بشكل مختلف متقسمة علي الي 67 شخصية مترتبين ترتيب أبجدي كل الشخصيات تربطهم علاقات ببعض سواء نسب او قرابة 

الرواية مقدمة كل شخصية بشكل عبقري سواء من الوصف الجسدي او الشكلي او النفسي للشخصية وتأثير الظروف الاجتماعية والسياسية علي كل شخصية بطريقة عظيمة 

والأعظم انه قدر يربط بين كل الشخصيات دي بدون سقطة او غلطة واحدة  ووصف يخليك كأنك شايف الشخصية وعايش معاها 

الرواية بتمثل حقبة زمنية من بداية دخول الحملة الفرنسية لمصر وصولا لفترة حكم الرئيس السادات وبتبين بشكل حلو جدا ازاي 

السياسة في مصر بتأثر علي الافراد وعلي الظروف الاجتماعية

كان فيه شخصية هي الجوكر في الرواية شخصية "راضية" بنت "جليلة" والشيخ "معاوية القليوبي" واللي عاصرت كل الأجيال وتأثير كل ده عليها

الرواية من وجهة نظري اختلافها وروعتها انها مفيهاش عقدة وحل ولكن هي توصيف لوضع اجتماعي وسياسي في مصر علي مر عقود كتير  

كل شخصية علي اختلاف شكلها وطبقتها الاجتماعية او اختلاف الحياة اللي بتعيشها سواء سعيدة او تعيسه فالآخر " ما دايم الا وجه الله " 

من أول صفحة لآخر صفحة في الرواية متعة وانبساط وعبره وعظة .. سواء تختلف مع ايدولوجيات نجيب محفوظ او تتفق لكن هو روائي عظيم .. الرواية كان ينقصها تتعملها شجرة عيلة زي اللي في رواية مائة عام من العزلة علشان توضح العلاقات وتداخلها 

حديث الصباح والمساء -- المسلسل

سنة 2001 اتعرض مسلسل حديث الصباح والمساء بطولة مجموعة كبيرة من الفنانين علي رأسهم العظيمة عبلة كامل واللي دورها لحد دلوقتي في المسلسل ده بيتضرب بيه المثل 

المسلسل جسد حوالي 24 شخصية بس من اصل 67 في الرواية .. برؤية الكاتب محسن زايد واللي غير شخصية الجوكر من "راضية" ل " جليلة " واللي أدت دورها عبلة كامل باقتدار 

المسلسل ماشي بنفس نسق الرواية من غير أي تغيير نهائي الحوار في المسلسل عظيم وأداء الممثلين فيه عظيم 

المسلسل كان إضافة للرواية انه رسخ شجرة العيلة في دماغ المتفرج بدل ما يقع في تشويش وهو بيقرأ الرواية 

تتر المسلسل من ألحان عمار الشريعي وكلمات فؤاد حجاج وغناء أنغام .. والل كان بيعبر بشكل جميل عن المسلسل متلخصة في كلمة " تلقي حكايات البشر فيها عبير العبر صادح" ولحن بيشبه الاحداث 

لو مقرأتش الرواية ولا اتفرجت علي المسلسل .. اتفرج علي المسلسل الاول وبعدها اقرأ الرواية 

أما لو اتفرجت علي المسلسل ف اقرأ الرواية لأنك هتستمتع جدا

ولو قرات الرواية أوعي يفوتك تتفرج علي المسلسل لأنك بردو هتستنتع بيه جدا 😅