يوم مع مسلسل My brilliant friend

 ليلا وإيلينا أهم بطلتين في المسلسل

بصراحة كنت ناوي أكتب موضوع تاني، إلا إن قضيت يومين الحقيقة مش يوم واحد مع مسلسل My brilliant friend الرائع. هو مسلسل إيطالي بيعتمد على البؤس الشديد نتيجة الفقر والجهل في إيطاليا الخمسينات. فتأكد إنك هتشوف مسلسل درامي كئيب وبائس تحديدًا بدرجة كبيرة. المسلسل من إنتاج شركة HBO وتقدروا تشوفوه - بالنسبة لغير الأمريكان طبعًا - على تطبيق وموقع Wavo. 

جمال المسلسل بيكمن في تطرقه لجوانب أهملت الفترة الحالية من المسلسلات وهي الجوانب الأسرية والمجتمعية. ممكن حد يختلف معايا ويقول لا فيه مسلسلات وأعمال فنية كتير بتتحدث عن المعاناة الأسرية والمجتمعية. الفكيرة إن معظم الأعمال الفنية بتطرق للموضوعات دي كجزء من قصة تانية بعيدة عن المحاور المجتمعية. يعني أشهر ترند من المسلسلات وتحديدًا إنتاج نتفلكس لابد وأن يحتوي أي مسلسل على كلمة Thriller أو Crime وThriller برضو. وبيكون في تسليط ضوء على الحياة الأسرية أو المجتمعية للأبطال. ولكن في الواقع مسلسل My brilliant friend كانت هي دي محاور القصة بتاعته. ممكن التريلير بتاعه يوضح الفكرة بشكل سريع.

يعطي الحلق للي بلا ودان

تقريبًا دا الشعار الأوحد في المسلسل. يعطي الحلق للي بلا ودان. وهنا لازم نحط Spoiler alert 🚨. المسلسل بيتكلم عن ليلا - اللي في يمين الصورة - وإيلينا - اللي في الشمال - وهم بنتين من أذكى بنات المدرسة الإبتدائية في أحد أحياء نابولي الفقيرة طبعًا. الاتنين بيتعرضوا للعنف الأسري تحت السلطة الأبوية وإن كانت ليلا بتتعرض لظروف أعنف شوية. الاتنين بينجحوا في المدرسة الإبتدائية بدرجات ممتازة وإن كانت ليلا - الأذكى - حصلت على مجموع أقل من إيلينا. 

هنا بيحصل الافتراق بين الصديقتين العزيزتين، وبتكمل إيلينا حياتها التعليمية بالذهاب للمدرسة المتوسطة بعد إقناع أهلها بالعافية إنهم يتكفلوا بالمصاريف. ودا تحديدًا اللي فشلت فيه ليلا، فهي مقدرتش تقنع أهلها بكدا، وطبعًا تعرضت لعنف شديد من أبوها عشان بتطلب حاجة كدا. 

بالرغم من إن إيلينا كانت ذكية وهتحافظ على مستواها بالمذاكرة طول الوقت واللي هيساعدها تتنقل للمدرسة الثانوية، إلا إن ليلا كانت الأذكى، وكانت بتحس إنها تستاهل حياة زي حياة إيلينا، ولكن بدون حقد عليها. وفي سبيل كدا هتفضل تقرأ في كتب أثناء شغلها مع أبوها في محل الأحذية. وكانت بتوصل لمستوى إيلينا في تعلم اللغات وكانت بتذاكرلها أحيانًا. وكل دا في سبيل واحد إنها - وكذلك إيلينا كانت بتفكر في كدا - تطلع من الحي القذر اللي هما عايشين فيه. ودا بيعرضنا لنقطة مهمة، هل هنستمر في السعي والكفاح حتى لو الحلق راح للي بلا ودان؟

حياة أكثر بؤسًا

في الواقع ليلا مقتدرش تقاوم، بعد فترة كفاح، خضعت نوعًا ما لقانون المجتمع بإنها تتخطب لواحد "غني" فكان بمثابة نجاة للأسرة ولكنها مش بتحبه. فتبدأ الصراعات الأسرية العنيفة، وفي الغالب مكنتش بتكسب فيها. إلا إنها قدرت تحتال على اسرتها نوعًا ما. وكفاية spoiling لحد كدا. هنا هيبتدي يظهر لينا جانب بائس تاني وهو المعاناة والألم الناتج عن التخلي عن الحلم، والانسحاق في المجتمع والزواج ومحي قدراتها العقلية. كل دا وأعز صديقتها بتتعلم وبتتفوق، وهي سعيدة ليها. إلا إن صديقتها نفسها هتحسدها على حياتها الكئيبة المليئة بالأحداث، واللي عكس حياتها السعيدة المملة. ودا بيحطنا قدام سؤال محوري، هل ممكن يكون البؤس أفضل من السعادة؟

اللافت للنظر في المسلسل هو إنك أكيد هتلاقي شخصيتك موجودة، أو عالأقل هتحصل عليها بمزج شخصيتين. أنا شخصيًا وجدت شخصيتي مزيج بين ليلا و نينو سارتوري. وأهم ما في المسلسل كعادة المسلسلات الأوروبية اللي مبقتش أتفاجئ بدا منها، وهي انتقال بين الأحداث على مهل، بحيث تعرض كل تفصيله صغيرة ممكنة. وكذلك عرض وافي للمشاعر والعواطف اللي بتكون مركبة ومش سطحية وبتوصل لأعماق قلبك. كل دا طبعًا غير المزيكا الإيطالية الكلاسيكية أو ال chamber music الجميلة في الخلفية. في النهاية المسلسل رائع وأنصح بيه بشدة، هو 8 حلقات يعني باخد يوم أو يومين و Happy weekend.